ایچی سن کالج کے معاملے پر وفاقی وزیراحد چیمہ نے گورنر پنجاب کو خط لکھ دیا
![](https://zemnews.com/wp-content/uploads/2024/03/2622756-ahadcheemabaleeghurrahman-1711471902.jpg)
لاہور: وفاقی وزیراقتصادی امور احد خان چیمہ نے ایچی سن کالج فیس معافی کے معاملے پر گورنر پنجاب کو لکھے خط میں کہا ہے کہ میرے بچوں کی فیس معاف نہ کی جائے، میں اپنے بچوں کے لیے اس سہولت سے فائدہ نہیں اٹھانا چاہتا۔
احد چیمہ نے گورنر پنجاب بلیغ الرحمان کو تحریر کردہ خط میں کہا ہے کہ میں یہ خط ایچی سن کالج میں زیر تعلیم اپنے بچوں کی چھٹی کے معاملے کے حوالے سے لکھ رہا ہوں، ان حالات میں، میں یہ بتانا چاہتا ہوں کہ میں اپنے بچوں کے لیے اس سہولت سے فائدہ نہیں اٹھانا چاہتا۔
انہوں نے مزید لکھا ہے کہ میں آپ سے پرزور گزارش کروں گا کہ براہ کرم کسی بھی منفی دباوٴ کے تحت نئی پالیسی کو واپس نہ لیں، کیونکہ یہ پالیسی آنے والے وقت میں طلبا اور ان کے والدین کے لیے بہت مددگار ثابت ہوگی، نئی پالیسی جو کالج میں طالب علم کے زیر تعلیم نہ ہونے پر فیس کو معاف کرتی ہے وہ منصفانہ اور روایتی اشرافیہ کی ذہنیت کے خلاف ہے اور آنے والے وقت میں طلباء اور ان کے والدین کے لیے بہت مددگار ثابت ہوگی۔
وفاقی وزیر نے اپنے مکتوب میں مزید کہا ہے کہ نئی پالیسی کو عام والدین میں بہت سراہا جاتا ہے اور میری اہلیہ نے اس مقصد کے لیے ڈیڑھ سال سے زیادہ جدوجہد کی ہے۔
خط میں مزید کہا گیا ہے کہ میں یہ بات بھی ریکارڈ پر رکھنا چاہتا ہوں کہ مختلف مواقع پر ایچی سن کالج کے پرنسپل نے ہمیں انفرادی طور پر ریلیف کی پیشکش کی، اور یہ بات کچھ معزز لوگوں کے ذریعے بتائی گئی جو اس معاملے کے علم میں تھے۔
احد چیمہ نے مزید لکھا ہے کہ میں یہ بھی بتانا چاہتا ہوں کہ ہم نے کسی بھی انڈر دی ٹیبل ڈیل لینے سے انکار کیا اور یہ واضح انکار اصولوں پر مبنی تھا۔
گورنر سے مخاطب ہوتے ہوئے انہوں نے کہا کہ آپ کے دفتر کو دی گئی درخواستوں کی بنیاد ہمارے اس یقین پر تھی کہ ہم جس چیز کی تلاش کر رہے تھے وہ منصفانہ، مناسب اور عوامی مفاد میں تھا، اور اس کا مقصد ایک غیر منصفانہ پالیسی فریم ورک کو بہتر بنانا تھا جس میں امیر اور غیر امیر والدین کے درمیان امتیاز کیا جاتا تھا۔
وفاقی وزیر کا کہنا تھا کہ اس معاملے میں حالیہ آرڈر، جو ایچی سن کالج کو کنٹرول کرنے والے قانون کے تحت آپ کے دفتر سے جاری کیا گیا ہے، نے ایک عجیب اور بے معنی تنازعہ کو جنم دیا ہے، جو ایک پرنسپل کی طرف سے شروع کیا گیا ہے جو پہلے ہی استعفیٰ دے چکے ہیں اورجارہے ہیں۔
انہوں نے کہا کہ بورڈ اور چیئرمین کے پالیسی فیصلوں سے پرنسپل کا ڈھٹائی اور اونچ نیچ سے انکار سننے میں نہیں آیا۔
احد چیمہ کے مطابق میرے خاندان کو اس ایپی سوڈ میں صرف میرے پبلک آفس ہونے کی وجہ سے طنز، طعن و تشنیع اور توہین آمیز مہم کا سامنا کرنا پڑا ہے، بصورت دیگر، منطقی طور پر کالج میں طلبہ کی تنظیم اور ان کے والدین ایک کمیونٹی بناتے ہیں جن کی حقیقی ضروریات اور مجبوریوں کا احترام کرنا چاہیے اور بورڈ اور انتظامیہ کو ان کا جواب دینا چاہیے۔
وفاقی وزیر کا کہنا تھا کہ بورڈ آف ڈائریکٹر کا پہلے کا فیصلہ اور آپ کا حتمی حکم اس معاملے میں درست سمت میں قدم ہے۔
واضح رہے کہ احد چیمہ کی اہلیہ نے اپنے بچوں کی فیس معافی کے لیے گورنر پنجاب بلیغ الرحمان کو درخواست دی تھی، گورنر کے کہنے پر بچوں کی تین سال کی فیس معاف کردی گئی تھی۔
اس اقدام کے خلاف ایچی سن کالج کے پرنسپل نےاحتجاجاً استعفیٰ دے دیا تھا، پرنسپل کے استعفیٰ کے خلاف طلبا اور ان کے والدین نے گورنر ہاؤس کے باہر احتجاج بھی کیا۔
دوسری جانب فیس معافی کا معاملہ سامنے آنے پر سوشل میڈیا پر اس سلسلے میں وفاقی وزیر احد چیمہ اور گورنرپنجاب پر تنقید کی جارہی تھی۔
%d8%a7%db%8c%da%86%db%8c-%d8%b3%d9%86-%da%a9%d8%a7%d9%84%d8%ac-%da%a9%db%92-%d9%85%d8%b9%d8%a7%d9%85%d9%84%db%92-%d9%be%d8%b1-%d9%88%d9%81%d8%a7%d9%82%db%8c-%d9%88%d8%b2%db%8c%d8%b1%d8%a7%d8%ad%d8%af